قدسية برمودائية

سمعت أكو لعبة مال (كرة قدم) بمنطقتنا وصديقي خابرني كالي تروح وياي؟ كتله ليش نروح وتدلل؟ منا صديقي سد التليفون ومنا اشتغلت الحسبات براسي.

اللعبة يرادلها كشخه، زين شلون اروحلها واني ما عندي ولا درهم (متخرج ومكظيها اتظاهر عالارصفة)، رحت لأمي اطلب منها كالت يمه اعذرني التقاعد بعد ما اجه وننتظر التعديل الجديد لأن الحكومة ناويه تزيد رواتبنه، وبوكتها انطيك من التقاعد يوميه خمس الاف، استغربت وكلتلها يمه زين ليش متسويها سبعة؟ خمسه للكارت مال الموبايل وألفين اكل بيهن فلافل اني وصديقي، كالت لا يمه استرعلينا، من نسويها الك سبعه بعدين تجي وتضربها في سبعة وتصير صرفياتك 7×7 وشيخلصنه ويا اخوتك.

دقايق وطفرت رحت لغرفة اخوية (غرفته خطيه بالطابق الثاني وكاعد بيها بالفانيله لان تكييفها بنكه عالمولده، وصح بيها سبلت بس طافي من زمان من يوم حولوا النظام الملكي الى جمهوري).

المهم كتله لأخويه :- بشرفك شوفلي من هدومك شي البسه واروح بيه ويا صديقي للملعب كال بشرفك فك عني ياخه (النتايج اليوم طلعت ودرجاتي من اولها لأخرها صفر، إي ادري جنت اروح للمدرسة لو جنت افوت للكوفي بلا ما انتبه؟)، وخر عني وروح كدامك الكنتور البس التريده منه.

فتحت كنتوره (التركي الصنع)، لأن خشبنا العراقي ديروح كله بتماس كهربائي، كلبت بالكنتور لحد ما تعبت، ملكيت حاجة تنلبس بس ملابس (للركبة)، بيني وبين نفسي كلت ادري اخويه بايع روحه وهدومه كلها برمودات؟، اي ادري هذا ميعرف شصار بالشباب؟، ادري ميخاف ينلزم بالشارع ويتهموه بخدش الحياء العام (وهو ابد ما مخدوش من 2003 لهسه، لان اصلاً حياء العراق وارد امريكي)، صحت بأخويه يمعود كل ملابسك متنراد وتودينه (4 برمودا).

المهم ماعجبني الوضع بغرفة اخوية نزلت ركض لأبويه لكيته ديتابع قناة دينية، وهو شكو ببلدنا غير (قنوات دينية حزبية اخبارية وشويه ماصخه وترفيهية)، كتله يابه اريد اترخصك واروح للعبة، جاوبني بابتسامه وبيها شويه خوفه عليه (ليش لا وليدي روح) بس ياريت وياجماعتك وياريت قبل الاذان تكدر ترجع.

يا ابني ذوله الفريق من يفوزون يشتغل الدك والركص بالشارع ومنا الجامع قريب، وتشتغل العركات بين اهل الجامع وبين الناس الطالعه من الملعب، اهنا كبل قاطعته وكتله هو الحظ ميجيب الملعب الا يم بيت الله؟، كال يا ابني لكلشي قدسيته بعد، وجيب الي يكظها، (فابعد عن القدسية وغنيلها)

زين لا فلوس حصلت ولا سلم تقاعد صعد ولا ملابس عندي اروح بيها غير بس برمودات اخويه، ولا اكدر افوت من يم بيت الله واروح للملعب ، ولا اكدر اتأخر لحد نهاية اللعبة ويصير وكت الصلاة ويصير اشتباك بين (اللعبة والعبادة).

سديت السالفة وخابرت صاحبي وكتله الغيها للروحه وبلا لعبة بلا بطيخ ، كال لعد اجيك للبيت واجيب الشله وياي ونكعد بالحديقة انحشش ونضحك ونتونس وخلي العِدة علينه، كتله بسلا تقصد العدة نركيله وهالسوالف؟ ابويه تره يموت منها، كال لا بابا انت شكد قديم، العدة من باب الشرجي، وصاحبها الي يوزعها ميخاف لا من ضابط ولا من مركز.

المهم اجوني الشباب وكعدنه واتونسنه واخذنه احلى (كورس كرستالي) أرخص من كل نوع موجود بالسوك، لأن مدعوم من قبل الارجنتين العربية المتحدة وعابر حتى على مركز شرطة باب الشيخ وفايت رسمي من الحدود ب 10 دنانير كويتية.

بلا طوبه بلا دوخة راس لان الحداثة بهالبلد صارت (موبايل وبوبجي وشريط يعدل الراس)، بلد ضايع بين قدسية المكان، ورسوب غفران، وهروب السجناء من وره القضبان، ومستشارة للنسوان، وسجن بالبرمودا للشبان، ولا ضل براسنه من الصبح لليل لا محتوى ولا عنوان.

وعلى كولة اهلنا (الما حصل روحه لبطولة اسيا سيل يتوكل على الله ويحضر نفسه لكأس العالم الي رح يستضيفه العراق 2164، وهاي تصير ورا ما تنتهي العنتريات الفارغة مال تاج راسي وراسك. وحضر عمامك وخوالك. وشيل عَلمي وحط عَلمك. وانطيني فلوسي ورا متصدر نفطاتك .. وهذا اقليمي وذاك اقليمك. والا نشوف الوطنية تصير 24 ساعة باليوم مو بالشهر.

ساعتها اهلا بكم في العراق المقدس من صدك (مو مقدس بس بالاسم وميعجبه لا كمان ولا برمودا)